Wycliffe Bible
1395 by John Wycliffe

Song of Solomon Chapter 1

Son 1:1 <>
Son 1:2 (1:1) Kisse he me with the cos of his mouth.
Son 1:3 (1:2) For thi tetis ben betere than wyn, and yyuen odour with beste oynementis. Thi name is oile sched out; therfor yonge damesels loueden thee.
Son 1:4 (1:3) Drawe thou me after thee; we schulen renne in to the odour of thin oynementis. The kyng ledde me in to hise celeris; we myndeful of thi teetis aboue wyn, schulen make ful out ioye, and schulen be glad in thee; riytful men louen thee.
Son 1:5 (1:4) Ye douytris of Jerusalem, Y am blak, but fair, as the tabernaclis of Cedar, as the skynnes of Salomon.
Son 1:6 (1:5) Nyle ye biholde me, that Y am blak, for the sunne hath discolourid me; the sones of my modir fouyten ayens me, thei settiden me a kepere in vyners; Y kepte not my vyner.
Son 1:7 (1:6) Thou spouse, whom my soule loueth, schewe to me, where thou lesewist, where thou restist in myddai; lest Y bigynne to wandre, aftir the flockis of thi felowis.
Son 1:8 (1:7) A! thou fairest among wymmen, if thou knowist not thi silf, go thou out, and go forth aftir the steppis of thi flockis; and feede thi kidis, bisidis the tabernaclis of scheepherdis.
Son 1:9 (1:8) Mi frendesse, Y licnede thee to myn oost of knyytis in the charis of Farao.
Son 1:10 (1:9) Thi chekis ben feire, as of a turtle; thi necke is as brochis.
Son 1:11 (1:10) We schulen make to thee goldun ournementis, departid and maad dyuerse with silver.
Son 1:12 (1:11) Whanne the kyng was in his restyng place, my narde yaf his odour.
Son 1:13 (1:12) My derlyng is a bundel of myrre to me; he schal dwelle bitwixe my tetis.
Son 1:14 (1:13) My derlyng is to me a cluster of cipre tre, among the vyneres of Engaddi.
Son 1:15 (1:14) Lo! my frendesse, thou art fair; lo! thou art fair, thin iyen ben the iyen of culueris.
Son 1:16 (1:15) Lo, my derling, thou art fair, and schapli; oure bed is fair as flouris.
Son 1:17 (1:16) The trees of oure housis ben of cedre; oure couplis ben of cipresse.